ها انا حزمت امتعتي .. وربطت حزام الامان .. متجه على طريق التدوين .. بسرعة بطئية .. اجهل وعورة الطريق .. الطرق المختصرة اجهلها ايضا .. ارى اشخاص على يمين الطريق ويساره .. ذكور وإناث ..عرب .. واجانب .. لافت انطلق في عالم التدوين .. مرحب بكل من يريد الركوب معه .. بالتوفيق لآفت ..
لي زميل اثق به ويثق بقدرتي على الكتابة والابداع النتي ..! ( ابداع جديد ) .. الانسان هذا دايم يعارضني .. اقول لون السماء زرقاء يقول لا سودا .. دايم اختلافات بيني وبينه الا ان علاقتي به قوية جدا ولو طلبني امرا لا ارده له ان كنت قادر على ذلك ..
مالكم بالطويلة .. مره من المرات وحنا راجعين انا وهو بعد زيارة زميل لنا يعمل براس تنورة .. الجو كان بارد .. وخط الرجعة شبه فاضي .. الساعة 4 فجرا .. بدينا نصارح بعض ..!
لا .. لا .. لايروح فكرك بعيد الله يرحم والديك ..!
هذا الادمي يمكن صداقتي معه من عشر سنوات .. ماعمره قال لي كلمة حلوة ولا جاملني هههه .. ياحليلك ياصديقي
المهم .. وحنا راجعين خفض صوت المسجل .. وسكت شوي .. انا داخل جو وخذاني التفكير وقمت اتذكر الاطلال والاحباب
قال محمد اقول لك شي ..!
قلت .. اموت يالاخلاق .. اخيرا صرت ادمي
قال .. تدري انك حقير
ناظرت في وجهه وهو متربط بالدركسون ( الدائري هذاك الي لما نضغطه بالنص يقول طاط > الوصف للسحليات ) قلت ادع ربك اخوك لا يجي مثلك ..! وارفع على المسجل وارجع واسند ظهري على السيت
خفض صوت المسجل وقال ..ياخي قسم بالله انك موهبة ..! يكفي انك زاحف ودايم تاخذ الاول ايام المدرسة ..! ليه تقتل موهبتك وابداعتك .. ليه .. ليه !
قلت .. لا صح بعد صح ( صح من الصياح .. من اشد انواع البكاء )
المهم الرجال قام يعطيني امثله مدري وش تبي ولا لام ام ام امها دخل بالموضوع .. دخلني بهتلر وطلعنا بصدام حسين .. وصلنا لايران ..!
قال .. ياخي ولد عمي عنده مدونة وهو ماعنده شهادة الا المتوسط وانت جالس بس على منتدى الزعيم والخرابيط الثانية ..!
قلت .. وش مدونة انت ووجهك
قال .. يعني يصير لك ديوان ( طلع ابو الشباب من جنبها ويسمع بالتدوين )
مابي اقول لكم وش وصفه لي عن المدونة لان راح تنصدمون من الكلام الي قاله ههههه
المهم دارت الليالي والايام .. والله راد اني ادخل على موضوع يتكلم عن المدونات والفائدة منها .. وقريت الموضوع كامل والردود كلها .. حتى وصلت لهذا المكان قبل ثلاث ساعات .. ومن بعد الثلاث ساعات كتبت هالموضوع الي بنهيه بنقطة .
